ਅਵਤਾਰ ਸਿੰਘ ਸੰਧੂ

ਗੀਤ 

ਅੱਖਾਂ ਦੱਸਣ ਕਹਾਣੀ ਕਿੰਝ ਰੋ ਰੋ ਬੀਤੇ ਰਾਤ ।
ਮੈਨੂੰ ਪਿਆਰ ਵਿੱਚ ਮਿਲੀ ਹੰਝੂਆਂ ਦੀ ਸੌਗਾਤ ।

ਕਿਸ ਦਰ ਉਤੇ ਜਾਵਾਂ ਕਿਹੜਾ ਪੀਰ ਮੈ ਧਿਆਵਾਂ ।
ਮੇਰਾ ਮਾਹੀ ਮੁੜ ਆਵੇ ਲੱਖ ਸ਼ਗਨ ਮਨਾਵਾਂ ।
ਉਹਦੇ ਬਿਨਾਂ ਇਥੇ ਕੋਈ ਮੇਰੀ ਪੁਛਦਾ ਨਹੀਂ ਬਾਤ ।

ਤਾਰੇ ਭਰਦੇ ਗਵਾਹੀਆਂ ਰਾਤਾਂ ਜਾਗਕੇ ਲੰਘਾਈਆਂ ।
ਮੇਰੇ ਪੋਟੇ ਘਸ ਗਏ ਲੱਖ ਔਸੀਆਂ ਵੀ ਪਾਈਆਂ ।
...ਮੇਰੀ ਮੱਸਿਆ ਬਣੇ ਕਦੇ ਪੁੰਨਿਆ ਦੀ ਰਾਤ ।

ਵੇ ਮੈ ਨਿੱਤ ਹੀ ਸੁਨੇਹੇ ਹੱਥ ਕਾਸਿਦਾਂ ਦੇ ਘੱਲੇ ।
ਤੇਰੀ ਕਰਦੇ ਉਡੀਕ ਅੱਜ ਹੋ ਗਏ ਹਾਂ ਝੱਲੇ ।
ਮੇਰੇ ਭਾਗਾਂ ਵਿੱਚ ਹੋਣੀ ਕਦੋਂ ਵਸਲਾਂ ਦੀ ਰਾਤ ।

ਮੇਰੀ ਉਮਰ ਨਿਆਣੀ ਡਾਹਢਾ ਇਸ਼ਕੇ ਦਾ ਰੋਗ ।
ਜਿੰਦ ਬਿਰਹੋਂ ਸਤਾਈ ਕੱਲੀ ਬਹਿਕੇ ਕਰੇ ਸੋਗ ।
ਸੰਧੂ ਆਣਕੇ ਬਚਾ ਲੈ ਮੋਤ ਲਾ ਕੇ ਬੈਠੀ ਘਾਤ

ਅਵਤਾਰ ਸਿੰਘ ਸੰਧੂ